Фото: Акимат области Жетісу
Кеше облыс әкімі Бейбіт Исабаев Қазақстан мәслихаттарының құрылғанына 30 жыл толуына орай Халықаралық әйелдер күнінің қарсаңында жергілікті мәслихаттардағы депутат әйелдермен кездесу өткізді, — деп хабарлайды Жетісу облысы әкімінің баспасөз қызметі.
Талдықорғандағы Салтанат сарайындағы кездесуде «Атамекен» ҰКП іскер әйелдер кеңесі әр салада еңбек етіп жүрген депутат әйелдердің қолынан шыққан өнімдерден арнайы көрме қойды. Атап айтқанда, «Ansar» ЖК-ның тіккен киім-кешектері, «Didakt-kz» ЖШС-ның текстиль бұйыдары, «Ли А.Д.» ЖК-ның кулинарлық тағамдары т.б. көпшілік назарына ұсынылып, облыс әкімі көрмені аралап көрді.
Дөңгелек үстел басында нәзік жандарды мерекелерімен құттықтаған Бейбіт Исабаев мәслихаттардың бүгінгі реформалар аясындағы жаңаша жұмыс стиліне қатысты біршама ой-пікірлерін білдірді.
— Жауапкершілігі зор, жүгі ауыр мәслихат депутаттығын сіздер ерлермен қатар абыроймен алып жүрсіздер. Біздің бірлескен жұмысымыздың нәтижесінде өткен жылды облыс жақсы көрсеткіштермен аяқтады. Бюджетті бекітіп қана қоймай, оның мақсатты, тиімді пайдалануын қадағалауда да белсенділік танытып келесіздер, — деп депутаттарға алғысын білдірген облыс басшысы бүгінде адал, таза, әділ қоғам құрамыз десек, заңға бағынатын, заңды сылайтын қоғам қалыптастыруымыз керектігін де тілге тиек етті. Оған халық ішінен сайланған депутаттар да үлес қосуға тиіс. Және еліміздің әрбір мүшесі қоғамды өзгертуге, мемлекетімізді дамытуға деген өзінің жауапкершілігін сезінгенде ортақ істе ілгерілеу болмақ. Осы орайда Бейбіт Исабаев мемлекет қолдауымен жеке ісін ашып отырған көп балалы аналардың бірқатарының есімдерін атап, олардың еңбекқорлығының, табандылығының өзгелерге үлгі екенін айтты.
«Біздің қазақ қоғамының тарихында әйелдердің рөлі ерекше болған. Бүгінгі күні де әйел-аналар заман талабына сай өзінің отбасындағы, қоғамдағы жауапкершілігін тең көтеріп, ел дамуына зор үлес қосып келеді. Әрдайым еңбектеріңіз жемісті, еліміздің еңсесі тік, мәртебесі әрдайым биік болсын», — деді Б. Исабаев.
Кездесуде Роза Ақжаркенова, Баршагүл Саятова және басқа да бірқатар депутаттар ой қосты. Өз аудан-қалаларының әлеуметтік жағдайын жақсартуға, өздері жұмыс істейтін салаларды дамытуға қатысты көтерген мәселелерінің бюджеттен қолдау тапқанына ризашылықтарын білдіріп, алдағы уақытта да бірлесіп жұмыс істейтіндеріне сенім білдірді.
Жетісу облысы әкімінің баспасөз қызметі.
Суреттерді түсірген: Дмитрий Ерофеев
