Фото: Акимат области Жетісу
Жетісу облысы Қаратал ауданы Көпбірлік ауылында заманауи жаңа спорт кешені салынып, іске қосылды. Ал Ақсу ауданы Көшкентал ауылында «Ауыл – ел бесігі» бағдарламасы аясында мәдениет үйі күрделі жөндеуден өтіп, ел игілігіне жаңа кейіпте ұсынылды, — деп хабарлайды Жетісу облысы әкімінің баспасөз қызметі.
Көпбірлік ауылы аудан орталығы Үштөбе қаласынан 180 шақырым жерде. Қызылбалық ауылдық округіне қарасты бұл ауылда 900-ден астам халық тұрады. Жергілікті тұрғындар спорт нысанының іске қосылуын асыға күткен еді. Мердігер компания «Sheber Metall» ЖШС бұл екі қабатты ғимараттың құрылысын 2023 жылы бастап, жуырда пайдалануға берді. Жобаның құны – 150 млн. теңге, қаржы облыстық бюджеттен бөлінген.
Жаңа нысанның салтанатты ашулы рәсіміне Қаратал ауданының әкімі Ұлан Досымбеков, облыстық дене шынықтыру және спорт басқармасының басшысы Ұлан Рысқұл және Қазақстанның еңбек сіңірген жаттықтырушысы, Қазақстан Республикасының құрметті спорт қайраткері Елсияр Қанағатов қатысып, тұрғындарды қуаныштарымен құттықтады.
— Дене шынықтыру мен спорт арқылы ұлт саулығын жақсарту бағытында елімізде барлық жағдай жасалып келеді. Бүгін ашылып отырған спорт кешені — соның айқын дәлелі. Бұл кешен жергілікті тұрғындардың игілігіне қызмет етіп, болашақ әлем чемпиондары мен жүлдегерлерін тәрбиелеп шығаратынына сенімім мол, — деді аудан әкімі Ұ.Досымбеков.
Жаңа спорт нысанының аумағы 240 шаршы метр. Мұнда балалар мен жасөспірімдердің дене шынықтыру клубы құрылып, спорттың күрес, волейбол, баскетбол түрлерінен секциялар жұмыс істейді. Сондай-ақ кешенде 11 штаттық бірлікке сәйкес тұрақты жұмыс орны ашылуда. Кешен заман талабына сай жабдықталған. Енді мұнда ауыл жастары мен жасөспірімдерінің бос уақыттарын тиімді өткізіп, спортпен шұғылдануына барлық мүмкіндік бар.
Сол сияқты жуырда Ақсу ауданы Көшкентал ауылында «Ауыл – ел бесігі» бағдарламасымен мәдениет үйі күрделі жөндеуден кейін қолданысқа берілді. Іргесі 1958 жылы қаланған ғимараттың күрделі жөндеуіне 310 млн. теңге, материалдық-техникалық базасын нығайтуға 20 млн. теңге бөлінді. Мердігер ұйым «Азамат құрылыс» ЖШС ғимараттың қабырғалары мен сейсмикалық жолақтарын нығайтып, жылу жүйесін орнатты, мәдениет үйін толықтай жаңа кейіпке енгізіп, айналасын абаттандырды. Мүмкіндігі шектеулі жандарға арналған сары жолақтар жасалып, пандус қойылды. Ғимаратта 180 орынды көрермен залы бар. Мұнда 3 мәдениет қызметкері жұмыс істейді. Мәдениет үйінде домбыра, вокал, қолөнер, үстел теннисі, шахмет үйірмелері бар. Ауылдық кітапхана да осы ғимараттың ішінде орналасқан. Кітапханадағы кітап қоры – 16400.
Жетісу облысы әкімінің баспасөз қызметі.
Фотосуреттердің авторы: Жеңіс Ысқабай және Ақсу ауданының әкімдігі.