Фото: Акимат области Жетісу
Жетісу облысының Кербұлақ ауданында 1 мың гектардан астам жерге жаңбырлатып суару технологиясы енгізіліп, мал азығы өсірілмекші. Бұл — ірі қара етін терең өңдеуге бағытталған үш кезеңнен тұратын іргелі инвестициялық жобаның алғашқы кезеңі ретінде іске асырылуда. Жобаның жүзеге асырылу барысымен облыс әкімі Бейбіт Исабаев танысып қайтты, — деп хабарлайды Жетісу облысы әкімінің баспасөз қызметі.
«Агрохолдинг-Жетісу» ЖШС Кербұлақ ауданының Жоламан массивінде суармалы 1 мың гектар жерге жаңбырлатып суару технологиясын енгізіп, жоңышқа, дәндік жүгері, арпа, бидай егуді жоспарлап отыр. Сөйтіп жобаның бірінші кезеңінде тұрақты өсірілетін мал азығын тиімді суғаруға арналған замауи инфрақұрылым жасалуда. Қазір құрылыс алаңында электр және су құбыры желілерін тарту, жалпы сыйымдылығы 147 000 м³ болатын төрт жаңа резервуар салу жұмыстары жүріп жатыр. Құрылыс жұмыстары келесі жылы аяқталады деп жоспарланған.
Шаруашылықтың бүгінде 25 бірлік техникасы бар, соның ішінде трактор, фронталды тиегіш, комбайн, жүк көлігі, аспалы және тіркемелі жабдықтарды атауға болады.
— Біз осы жаңбырлатып суару технологиясын орнатуға жалпы сомасы 5,1 млрд. теңге инвестиция саламыз. Су үнемдеу технологиясын енгізу шығындарының белгілі бір мөлшері мемлекет тарапынан субсидияланады. Бұл — біз үшін үлкен көмек. Мал бордақылау алаңы үшін алдымен малға сапалы азық керек, сондықтан малдың жем-шөбін өзіміз өндіретін боламыз. Одан кейін бес мың басқа дейін мал бордақылап, ірі қара етін бөлшектеуден дайын өнімге дейінгі терең өңдеуден өткізуді жоспарлап отырмыз, бұл – біздің экспортқа бағытталған басты стратегриялық бағытымыз, — дейді шаруашылық өкілі Данияр Сәлімбаев.
Оның айтуынша, жоба толық іске асырылғанда кәсіпорында автоматтандырылған жүйе орнатылады, заманауи цехтар, дайын өнімді сақтайтын және тасымалдайтын тоңазыту және логистикалық инфрақұрылым жасалады.
Облыс әкімі өз сөзінде өңірде су үнемдеу технологиясын қолдану аясын кеңейту мен ауыл шаруашылы өнімдерін өңдеуге баса көңіл бөлінетінін айта келе, мұндай жобалардың өңір кәсіпорындарының шикізаттық модельден өнідірістің толық циклына өтуіне, жаңа жұмыс орындарының ашылуына мүмкіндік беретінін айтты.
Жалпы Жетісу облысында бүгінгі күнде 36,1 мың гектар жерге су үнемдеу технологиясы қолданылады, соның 14,1 мың га — тамшылатып, 22,0 мың га — жаңбырлатып суару технологиясы.
Жетісу облысы әкімінің баспасөз қызметі.
Фотограф: Жеңіс Ысқабай
