Фото: Акимат Алматы
Алғыс айту күніне орай Алматы қаласы әкімдігінің бастамасымен педагогикалық еңбек ардагерлеріне арналған «Алғыс айтар ұрпақ бар» атты салтанатты концерт ұйымдастырылды. Жас ұрпақты тәрбиелеуге ғұмырын арнаған ұстаздарға тағзым ету мақсатында өткен бұл рухани кеш ұрпақтар сабақтастығы мен терең құрметтің айқын көрінісіне айналды.
Іс-шараға 300-ден астам ардагер-ұстаз қатысып, оларға ерекше құрмет көрсетілді. Салтанатты бөлімде білім басқармасының өкілдері қала басшылығы атынан педагогика ардагерлеріне шынайы алғыс білдіріп, олардың ел болашағын қалыптастыру жолындағы өлшеусіз еңбегін атап өтті.
Концерттік бағдарлама мазмұнымен және әсерлілігімен ерекшеленді. Сахна төрінде сырлы әндер шырқалып, күйлер күмбірледі, шығармашылық ұжымдар көркем хореографиялық қойылымдарын ұсынды. Әрбір өнер көрсетілім ұстаз еңбегіне деген ықылас пен құрметтің айғағына айналды. Кеш қонақтары жағымды әсер алып, ерекше жылы әрі әсерлі атмосфераның куәсі болды.
«Алғыс айтар ұрпақ бар» атты мерекелік концерт ұстаз мамандығының қоғамдағы маңызын айқындай түскен тағылымды іс-шара болды. Педагогика ардагерлерінің даналығы мен өмірлік тәжірибесі ел дамуының берік іргетасы екені тағы бір мәрте айқындалды.
Мұндай мазмұнды іс-шаралар ұрпақтар арасындағы рухани байланысты нығайтып, қоғамда сыйластық пен алғыс айту мәдениетін қалыптастыруға жол ашады.
