13 қарашада Қазақстан Баспасөз клубының ұйымдастыруымен «Taza Sailau» тәуелсіз бақылаушылар желісі туралы брифинг өтті. Қозғалыс мүшелері БАҚ өкілдерімен кездесіп, бақылау желісінің мақсаты туралы сөз қозғады.
7-қараша күні zoom-конференцияда бір топ белсенді азаматтардың қатысуымен алдағы парламент сайлауын бақылау мәселесі талқыланған еді. Конференцияда қатысушылар тәуелсіз бақылаушылар желісін құруға қатыста ортақ шешімге келіп, Бигелді Ғабдуллин оны «Таза сайлау» деп атауды ұсынды.
13 қарашада өткен брифинг барысында қатысушылар «Таза сайлау» тәуелсіз бақылаушылардың азаматтық қозғалысын құру, алдағы Парламент Мәжілісі мен мәслихаттар сайлауын бақылау туралы жоспарымен бөлісті.
Жанна Ахметова фейсбук парақшасындағы жазбасы қолдау тауып, жергілікті азаматтардың көп хабарласып жатқанына риза екенін айтты. Бигелді Ғабдуллин «Taza sailau» республика бойынша қалалардағы сайлау учаскелерінде бақылау жасауға ниетті екенін жеткізді. Сондай-ақ ол «Taza sailau» мүшелерінің ешқандай партияда жоқ екенін, қозғалысты ешкім қаржыландырмайтынын баса айтты.
«Біздің алдымызда жалғыз міндет тұр. Ол – сайлаудың әділ өтуін қадағалау. Жаңа буын келді. Олар да сайлау учаскелеріне дауыс беруге келеді. Біз таза сайлау өткізу арқылы тәуелсіз сайлаушылардың жаңа буынын тәрбиелеуді көздеп отырмыз», – деді Бигелді Ғабдуллин.
Махат Садық қазір әлеуметтік желіде сайлауға бақылау жасауға шақырған бастамалардың көп екеніне тоқталды. Сол себепті жастармен тәжірибе бөлісу мақсатында осы бастамаға қолдау білдіруге шешім қабылдағанын айтты. Ол құрылып жатқан «Таза сайлау» жүйесінің ешқандай саяси ұйым емес екенін, жалпы мақсаты алдағы Мәжіліс және мәслихаттар сайлауынығң әділ және таза өтуі үшін бақылау жасау, қоғамның жауапкершілігін арттыру екенін баса айтты.
Оның артынша сөз алған Эдуард Полетаев бұған дейін Қазақстанда өткен сайлауларға қалай бақылау жасалғанын, оның ішінде халықаралық бақылаушылардың үні басым екенін жеткізді. Сонымен қатар, бұл жұмысты жүйелі ұйымдастыру қажеттігін айтып, қоғам тарапынан бақылау жасаудың маңызына тоқталды.
Журналист Ерқанат Көпжасар алдағы сайлаудың әділ өтуі тиіс екенін айтып, осы іске мүдделі барлық азаматтарды «Таза сайлау» желісіне қосылуға шақырды. Тәуелсіз бақылаушылар әр сайлаушының дауысы үшін күресетінін, егер сайлау әділ өтпейтін болса, сайлау туралы заң аясында әрекет ететінін жеткізді.
«Біздің жұмысымыз бір күнде бітеді. Яғни, тек сайлау кезінде ғана жұмыс істейміз. Бір жарым ай ғана қалды. Ең басты мәселе – халықтың сайлауға келуі. Халықтың белсенді болғаны маңызды. Халық болашағына немқұрайлы қарамауы керек», – деді Ерқанат Көпжасар.
Азаматтық қоғам белсенділерінің сөзінше, олар сайлауды онлайн режимде бақылауға және заң бұзушылықтарды жедел түрде басуға мүмкіндік беретін әлеуметтік желіге, заманауи байланыс құралдарына, сондай-ақ олардың бастамасын қолдайтын қоғам мен журналистердің белсенділігіне сенеді. Ол үшін бастамашылар арнайы #tazasailau хэштегін де іске қосады.
Айта кетейік, келер жылдың 10 қаңтарында Мәжіліс сайлауы өтеді. Сайлауға 6 партия қатысады.
